Dili, 24 Outubru 2024

Sua eselénsia Ministru no Vise Ministru Komérsiu no Indústria Sr. Nino Pereira no Sr. Augusto Junior Trindade ne’ebe akompaña husi Diretor Jeral, Diretor Nasional, Xefe Departamentu, Inspetór no asesór sira iha MCI, halo audiénsia publika ho Deputado sira husi komisaun D ne’ebe trata asuntu Ekonomia no Dezenvolvimentu, hodi aprezenta relatóriu ezekusaun Orsamentu 2024 no planu ezekusaun orsamentu 2025 iha sala konferénsia PN.

Audiénsia ne’e ho objetivu atu partilla informasaun ba Deputado sira relasiona ho progresu servisu no plano ezekusaun orsamentu iha Ministériu Komérsiu no Indústria nian, hodi garante dinamizasaun no kresimentu ekonomiku iha politika nomos lejislativa liu-liu ba esforsu sira ne’ebe maka MCI halo liuhusi funsionamentu institusional nomos investimentu ba iha diversifikasaun ekonómiku.

Ministériu Komérsiu no Indústria responsavel ba konsesaun, ezekusaun, koordenasaun no avaliasaun politika sira ne’ebe define no aprova ona husi konsellu Ministrus ba iha área atividade ekonomika komersiál no industrial hodi kontribui ba dinamizasaun ba atividade ekonómika inklui atividade sira ne’ebe maka kona-ba kompetividade nasionál no internasionál.