Dili,05 Novembru 2024
Ministru Komérsiu no Indústria Nino Pereira partisipa lansamentu loja Hakbi’it Feto Timor-Leste, Plataforma aprendijajen ho manual pre-kasamentu Iha edifisiu Rede Feto, Caicoli Dili.
Objetivu husi estabelese loja Hakbi’it Feto TL ne’e, atu fornese fatin fa’an no liga merkadu hodi promove produtu ai-han lokal sira ne’ebe prosesa ona, hortikultura(agrikultura) no artefa sira iha Dili nomos promove no faan produtu lokal sira ne’ebe mai husi grupu benifisiariu feto agrikultor sira atu haforsa no hametin feto sira iha vida sosial no ekonomika, liu husi kapasitasaun hodi apoia dezenvolve no empodera feto nia partisipasaun iha sosiedade no atividade ekonomika, liuliu feto nia involvimentu iha kadeia de valor no Sistema merkadoria.
Ministru Nino Pereira hateten luta feto ne’e tama iha dimensaun foun hodi alkansa ba iha dimensaun libertasaun povo.
“Luta feto ne’e tama iha dimensaun foun nian, dimensaun libertasaun do povu kolektivamente ita hakarak alkansa to’o iha espasu ida ne’eba, ne’e sai hanesan responsabiliadade ita hotu nian, tanba ita projeta ba iha futuru entaun iha servisu lubuk ida, ita hotu tenki halo, konserteza ho Timor-Leste nia ligasaun ba mundu ne’e mos lori implikasaun bo’ot, liliu iha parte ekonomia, ohin loron ita koalia kona-ba feto tenki iha poder ekonomia, feto tenki iha sai kampeaun iha negosiu rezultadu hatudu ona, laos sai emprezariu bo’ot maibe ita hare’e ki’ik sira ne’ebe maka tutur hela sasan todan husi sira nia hela fatin ba fatin do’ok , hodi faan deit produtu ida, Esforsu ne’ebe maka ita nia inan feto sira halo ne’e hodi kontinua moris”. Afirma Ministru MCI
Loja hakbiit feto Timor-Leste, sei sai hanesan sentru produtu lokal iha Dili ne’ebe sei halo promosaun no fa’an produtu hirak ne’ebe produs husi benifisiariu organizasaun sosiedade Sivil nian no grupu feto sira husi membru rede feto Timor-Leste.
