𝐂𝐨𝐦𝐩𝐚𝐧𝐡𝐢𝐚 𝐂𝐫𝐢𝐬𝐭𝐢𝐚𝐧𝐨 𝐌𝟐𝐓 𝐄𝐧𝐢𝐧 𝐚𝐩𝐫𝐞𝐳𝐞𝐧𝐭𝐚 𝐩𝐫𝐨𝐝𝐮𝐭𝐮 𝐧𝐚𝐭𝐮𝐫𝐚́𝐥 𝐛𝐚 𝐌𝐂𝐈

Dili, 11 Marsu 2025

Companhia Cristiano M2T Enin aprezenta ninia perfil no produtu naturál sira ba Sua Exelénsia, Vise Ministru Komérsiu no Indústria, Sr. Augusto Júnior Trindade, durante serimónia ne’ebé hala’o iha Vise-Ministru nia gabinete, iha Fomento Mandarin, Dili.

Iha eventu ne’e, Sua Exelénsia, Vise Ministru Komérsiu no Indústria, hato’o agradesimentu no louva inisiativa ne’e, hodi subliña importánsia atu diversifika ai-horis moringa nu’udar rekursu ho valór ekonómiku aas, ne’ebé bele hatán ba nesesidade konsumidór sira nian.

“Ha’u apresia inisiativa ida ne’e no enkoraja aumentu kontinua iha produsaun. Esensiál tebes atu garantia kualidade produtu liuhosi teste laboratóriu hodi evita impaktu negativu ba konsumidór sira,” dehan vise-ministru ne’e.

Reprezentante empreza Cristiano M2T Enin esplika katak, to’o ohin loron, empreza prodús ona xá naturál hosi moringa, prosesa hosi ai-horis nia fulin no ai-funan, kombina ho jengibre no ai-moruk tradisionál sira seluk hosi tipu produtu naturál walu, destinadu ba kuidadu no prevensaun hosi tipu moras sanulu.

“Transformasaun moringa ba xá no mina naturál iha propriedade medisina ne’ebé bele ajuda trata kondisaun saúde oioin, hanesan fatuk iha urinária, infesaun urinária, regula tensaun arteriál no kolestrol, hametin sistema imunidade, trata reumatismu no gota, prevene moras fuan, kontrola midar iha raan, entre sira seluk,” esplika reprezentante empreza ne’e.

Agora daudaun, Kompañia Cristiano M2T Enin produz ona produtu sira-ne'e iha eskala boot, no sira disponivel iha merkadu no iha supermerkadu sira iha nasaun laran.