𝐑𝐞𝐬𝐭𝐚𝐮𝐫𝐚𝐧𝐭𝐞 𝐔𝐦𝐚 𝐒𝐚𝐮𝐝á𝐯𝐞𝐥 𝐒𝐞𝐫𝐯𝐞 𝐇𝐚𝐡á𝐧 𝐓𝐫𝐚𝐝𝐢𝐬𝐢𝐨𝐧á𝐥 𝐎𝐫𝐠á𝐧𝐢𝐤𝐮 𝐧𝐨 𝐒𝐚𝐛ó𝐫 𝐍𝐚𝐭𝐮𝐫á
Dili, 11 Marsu 2025
Tersa semana ne’e Ministru Nino Pereira vizita Yakobiatus Maria da Cruz ho nia perseiru hodi haree rasik negósiu ne'ebé sira hala'o iha Restaurante Uma Saudável, Farol, Dili.
Yakobiatus ho nia parseiru nu'udar joven ne'ebé sai modelu ba joven sira seluk iha negósiu, kriasaun empregu no kontribui ba dezenvolvimentu ekonómiku. Joven ida-ne'e iha inisiativa, vontade no inovasaun ne'ebé bele inspira joven sira seluk.
Joven mane ne'e ho nia parseiru hala’o atividade kulinária ne'ebé mak serve hahán tradisionál. Negósiu ida-ne'e sai ona fonte rendimentu ba nia familia no ba joven hirak ne'ebé serve iha Restaurante ne’e.
Iha momentu hetan vizita, Yakobiatus simu Ministru Nino Pereira iha ninia restaurante, ho kontente no esperánsa. Joven hosi Lautem ne'e konsidera prezensa Ministru Nino Pereira nian bele lori mensajen pozitivu ba nia kliente sira no mós enkoraja joven sira atu foti inisiativa emprezariál no aproveita oportunidade negósiu hodi transforma moris iha Timor-Leste.
"Ha'u ho kolega sira sente kontente teb-tebes. Señor Ministru nia vizita ida-ne'e ajuda promove ami-nia negósiu no liu-liu promove hahán tradisionál ne'ebé serve iha Restaurante Uma Saudável ne'e." Dehan Yakobiatus.
Ministru Nino Pereira nia vizita lori mós mensajen katak Governu Timor-Leste kontinua apoia inisiativa emprezariál sira no la abandona sidadaun sira-ne'ebé esforsu hela atu muda sira-nia moris.
“Orgullu tebes ho ita-nia joven sira ne’ebé maka kreativu. Sira iha hanoin inovativu. Sira bele hamosu ideia sira ne’ebé furak. Ideia sira ne’ebé maka bele hakbi’it duni sira-nia personalidade hanesan joven Timoroan, ne'ebé hakarak kontribui iha dezenvolvimentu,” Ministru louva.
Yakobiatus fahe esperiénsia kona-ba ninia inisiativa ida ne’e ba Ministru Nino Pereira. Nia haktuir katak, molok hahú negósiu ida-ne'e nia serbisu ba ema no manan esperiénsia natoon. Nia mós aproveita oportunidade sira atu aprende liután hodi hetan abilidade kona-ba kulinária, atu hahú rasik negósiu ida ne’e. Entaun korajen, esperiénsia no abilidade mak halo nia bele enfrenta risku sira iha negósiu ida-ne'e.
"Esperiénsia natoon ne’ebé maka nia iha no brani atu foti risku. Brani para atu hahú ka inisia negósiu, ne’ebé maka la'ós tulun de'it ba ninia an maibé mós tulun foinsa’e sira seluk. Nia kria duni empregu ba nia an rasik no ba foinsa’e sira seluk." Afirma Ministru.
Liután Ministru Nino Pereira hatete, Ministériu Komérsiu no Indústria ne’ebé nia lidera, sei halo esforsu atu suporta inisiativa emprezariál sira hanesan ne'e, nune’e joven sira bele partisipa ativamente iha prosesu dezenvolvimentu ekonómiku.
Inisiativa ida-ne’ebé maka durante ne'e Ministériu Komérsiu no Indústria halo ona maka organiza feira ba promosaun no demonstrasaun produtus nasionál, no apoiu kapasitasaun no finanseiru liuhosi programa Youth Employment and Enterpreneurship Skill (YEES).
Ministériu Komérsiu no Indústria sei konvida joven ida-ne'e atu hatudu mós ninia negósiu iha eventu feira ne'ebé sei organiza iha futuru.
Sira mós bele aprezenta planu negósiu, tanba Restaurante Uma Saudável serve hahán tradisionál ho tempeiru lokál orgániku no saudável. Sira hamosu tempeiru orgániku ho sira-nia matenek rasik.
Iha restaurante ida-ne’e ita hetan hahán tradisionál orgániku ho sabór naturál.
