𝐕𝐌𝐂𝐈 𝐇𝐚𝐥𝐨 𝐀𝐛𝐞𝐫𝐭𝐮𝐫𝐚 𝐛𝐚 𝐅𝐨𝐫𝐦𝐚𝐬𝐚𝐮𝐧 𝐓𝐞𝐤𝐧𝐢𝐤𝐮 𝐏𝐥𝐚𝐧𝐞𝐚𝐦𝐞𝐧𝐭𝐮 𝐧𝐨 𝐑𝐞𝐥𝐚𝐭𝐨𝐫𝐢𝐮 𝐄𝐳𝐞𝐤𝐮𝐬𝐚𝐮𝐧

Dili, 12 Marsu 2025

Sua Exelénsia, Vise Ministru Komérsiu no Indústria, Sr. Augusto Júnior Trindade, prezide serimónia abertura ba formasaun kona-ba Téknika Planeamentu no Relatóriu Ezekusaun, ne’ebé hala’o iha salaun Ministériu Agrikultura, iha Munisípiu Ermera.

Objetivu prinsipál husi formasaun ne’e mak atu haforsa kapasidade funsionáriu públiku sira ne’ebé servisu iha área planeamentu, finansa no sekretariadu munisípiu sira, fó ba sira ferramenta nesesária hodi prepara planu orsamentál ba tinan oin.

Iha abertura serimónia ne’e, Sua Exelénsia, Vise-Ministru Komérsiu no Indústria destaka importánsia hosi formasaun ne’e nu’udar meiu ida atu halo diagnóstiku no hadi’a planu boot Ministériu nian, hodi destaka papél fundamentál MCI nian iha diversifikasaun ekonomia nasaun nian.

“Papel MCI importante tebes tamba ne’e maka hosi Planeamentu hanoin katak minimal planu no relatroiu ezekusaun ne’e diresaun sira hotu iha konesimentu liliu ba iha area planeamentu ne’e rasik”, hateten VMCI.

Diretór Nasionál Servisu Koordenasaun no Planeamentu (DNCSP), Sr. Mário Filipe esplika katak formasaun ne’e organiza hosi Departamentu Planeamentu ho intensaun atu fó formasaun ba tékniku sira iha área planeamentu no finansa nian, hodi permite sira atu hadi’a preparasaun relatóriu trimestrál no anuál sira.

“formasaun ne’ebe kada tinan halo, atu melora funsionariu sira ne’ebe servisu iha tekniku planeamentu no relatoriu ezekusaun sira, atu fasil liu bainhira tama trimestre sira hodi halo relatoriu”, hateten DNKSP.

Formasaun ne’e organiza husi Diresaun Jerál Servisu Kooperativa, liu husi Diresaun Nasionál Servisu Koordenasaun no Planeamentu, no sei hala’o durante loron tolu iha Munisípiu Ermera. Eventu ne’e partisipa husi funsionáriu públiku na’in 50, inklui reprezentante Diresaun Nasionál, Diretór servisu desentralizadu husi munisípiu sira no Rejiaun Administrativa Espesiál Oe-Cusse Ambeno (RAEOA).