𝐕𝐌𝐂𝐈 𝐄𝐧𝐬𝐞𝐫𝐚 𝐟𝐨𝐫𝐦𝐚𝐬𝐚𝐮𝐧 𝐂𝐁𝐏 𝐛𝐚 𝐌𝐢𝐧𝐢𝐬𝐭𝐞́𝐫𝐢𝐮 𝐬𝐢𝐫𝐚 𝐡𝐨 𝐏𝐢𝐥𝐚𝐫 𝐀𝐄𝐂
Dili, 14 Marsu 2025
Sua Exelénsia, Vise Ministru Komérsiu no Indústria, Sr. Augusto Júnior Trindade, prezide serimónia enseramentu ba formasaun Programa Hasa’e Kapasidade (CBP), ne’ebé organiza husi Ministériu Negósiu Estranjeiru no Kooperasaun (MNEC) parseria ho Sekretariadu ASEAN (ASEC) no Banku Dezenvolvimentu Aziátiku (ADB). Eventu ne’e hala’o iha Otél Timor, iha Dili, Kinta-feira ne’e, loron 13 fulan Marsu.
Formasaun ne’e halibur pontu fokál sira hosi ministériu oioin ne’ebé halo parte iha Pilar Komunidade Ekonómika ASEAN (AEC), ho objetivu atu atualiza partisipante sira kona-ba progresu prosesu adezaun Timor-Leste nu’udar membru plenu ASEAN nian.
Iha serimónia ne’e, Sua Exelénsia, Vise Ministru Komérsiu no Indústria hato’o ninia apresiasaun ba ASEC no ADB ba sira-nia apoiu hodi hasa’e kapasidade ministériu sira ne’ebé envolve iha Pilar AEC.
“Lori Governu Timor-Leste nia naran, ha’u agradese ba Sekretariadu ASEAN no ADB ne’ebé kolabora ona ho Ministériu Negósiu Estranjeiru no Kooperasaun hodi hametin kapasidade institusionál no rekursu umanu Timor-Leste nian, hodi permite partisipasaun ne’ebé efetivu liu iha prosesu integrasaun rejionál”, hatete vise-ministru.
Treinamentu ne’e hala’o durante loron tolu, husi loron 11 to’o 13 fulan-marsu tinan 2025, no kobre tópiku estratéjiku sira ne’ebé treinadór sira hili atu hasa’e kapasidade funsionáriu sira husi ministériu no ajénsia sira ne’ebé responsavel ba implementasaun Akordu Ekonómiku ASEAN nian.
Iha enseramentu, Vise-Ministru Komérsiu no Indústria, hamutuk ho reprezentante sira husi ASEC, ADB no MNEC, fahe sertifikadu ba partisipante sira ne’ebé kompleta formasaun.
