"𝐏𝐚𝐮𝐧 𝐋𝐞𝐪𝐮𝐢𝐧𝐭𝐚𝐞" 𝐏𝐚𝐝𝐞𝐫𝐢𝐚 𝐎𝐫𝐢𝐞𝐧𝐭á𝐥: 𝐈𝐧𝐝ú𝐬𝐭𝐫𝐢𝐚 𝐊𝐢𝐢𝐤 𝐍𝐞’𝐞𝐛é 𝐄𝐳𝐢𝐬𝐭𝐞 𝐧𝐨 𝐊𝐨𝐧𝐭𝐢𝐧𝐮𝐚 𝐊𝐫𝐞𝐱𝐞

Dili, 03 Abril 2025

Paderia Orientál hanesan empreza ki'ik ida ne'ebé durante ne'e produz paun no doxe, eziste desde tempu rezistensia too mai ohin loron, ne'ebé maka distribui iha loja sira iha sidade Dili.

Iha Kinta-Feira semana ne’e, Sua Eselénsia, Ministru Komérsiu no Indústria, Sr. Nino Pereira hala’o vizita ida ba Empreza Paderia Oriental Unip.Lda ne’e, hodi haree besik atividade produsaun ne’ebé empreza ki'ik ne’e hala'o iha Lahane Oriental.

Vizita ida ne’e hanesan mós asaun ida atu enkoraja kresimentu mikro-negósiu sira iha territóriu tomak, atu kontinua iha kriatividade no inovasaun hodi kontribui iha dezenvolvimentu ekonómiku.

Ita bele haree hosi empreza Paderia Orientál, hala'o atividade kategoria hanesan indústria ki'ik ida, ultrapasa dezafiu oioin no hahú daudaun dezenvolve an no mós diversífika ona sira-nia produtu. Uluk tunu de'it paun manas maibé agora iha mós paun midar , rotitawar, dosi donat ka keiju, tuir saida maka merkadu husu.

Lori Governu, hakarak apresia empreza ida-ne'e no enkoraja nafatin ninia kreximentu, atu kontribui mós iha diversifikasaun ekonómika no kriasaun empregu.