𝐕𝐌𝐂𝐈 𝐡𝐚𝐥𝐨 𝐀𝐩𝐫𝐞𝐣𝐞𝐧𝐭𝐚𝐬𝐚𝐮𝐧 𝐕𝐢𝐳𝐚𝐮𝐧 𝐉𝐞𝐫𝐚𝐥 𝐊𝐥𝐢𝐦𝐚 𝐈𝐧𝐯𝐞𝐬𝐭𝐢𝐦𝐞𝐧𝐭𝐮 𝐈𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞 𝐛𝐚 𝐈𝐧𝐯𝐞𝐬𝐭𝐨𝐫 𝐒𝐢𝐫𝐚 𝐈𝐡𝐚 𝐌𝐚𝐥𝐚𝐲𝐬𝐢𝐚

Malaysia, 21 Abril 2025

Sua Eselensia Vise Ministru Komersiu no Indústria Sr. Augusto Júnior Trindade, akompaña hosi Embaxador Timor-Leste iha Malaysia, Sr. Lisualdo Gaspar halo reuniaun ho seitor privadu sira hosi Malaysia, aprejenta vizaun jeral konaba klima investimentu iha Timor-Leste, iha Kuala-lumpur Malaysia, sabadu, 19/04.

Iha reuniaun ne’e VMCI, hateten Timor-Leste iha ekonomia ida ne’ebé ho dimensaun ki’ik maibé riku ho potensiál tamba sai ona membru Organizasaun Komersiu Mundial (OMK) no progresa ativamente ba adezaun tomak ba ASEAN ho movimentu ida ne'ebé subliña kompromisu estratéjiku ba integrasaun rejionál, fasilitasaun komérsiu, no promosaun investimentu.

“Liuhusi ASEAN, ami hakarak, aliña ita-nia regulamentu nasionál sira ho padraun komérsiu no investimentu rejionál sira; Partisipa iha kadeia fornesimentu rejionál sira no korredór industriál sira; Hametin fasilitasaun komérsiu no infraestrutura transfronteirisu; no Aprende husi prátika di'ak liu rejionál sira iha inovasaun, PME sira, no sustentabilidade”, hateten VMCI.

VMCI mós afirma, ita-nia diresaun estratéjiku klaru: ita investe iha ita-nia ema, hametin instituisaun sira, no promove inovasaun no empreendedorizmu. Ho parseiru sira ne’ebé loos no ho investimentu ba tempu naruk, Timor-Leste prontu atu realiza nia vizaun kona-ba dezenvolvimentu ne’ebé inkluzivu no sustentável.

“Atu taka, ha’u hakarak reafirma Timor-Leste nia kompromisu maka’as ba ekonomia ida ne’ebé nakloke, inkluzivu, no amigavel ba negósiu. Enkuantu ita integra liután iha arkitetura ekonómika globál no rejionál, ita mós serbisu ho badinas atu hametin ita-nia kapasidade doméstika sira, harii instituisaun sira, no haburas modelu kreximentu ida ne'ebé lidera hosi setór privadu”.

Membru governu ne’e mós konvida investidór no líder emprezariál sira hotu atu esplora oportunidade sira ne’ebé Timor-Leste oferese. Atu sai parseria diak hodi kontribui la'ós de'it ba susesu ekonómiku, maibé mós ba pás, sustentabilidade, no prosperidade.

Reuniaun ne’e partisipa hosi investidór, lider emprezariál sira iha Malaysia hamutuk nain 50 no iha interese atu vizita Timor-Leste iha tempu badak.

Search

Recent Posts