Jenebra, Suisa, 8 Jullu 2026 - Iha marjen Asembleia Estadu-membru Organizasaun Mundiál ba Propriedade Intelektuál (OMPI) ba dala neen-nulu-resin-ualu, Ministru Komérsiu no Indústria, Sua Exelénsia Sr. Nino Pereira, akompañadu husi Embaixadór no Reprezentante Permanente Repúblika Demokrátika Timor-Leste iha Jenebra, Sua Exelénsia Sr. António da Conceição, no mós membru delegasaun sira seluk, hala’o enkontru kortezia ida ho Diretora Ezekutiva ITC, Sra. Pamela Coke-Hamilton, iha eskritóriu ITC, hodi ko’alia kona-ba kooperasaun ne’ebé la’o hela no prioridade sira ba futuru.

Ministru Nino Pereira hato’o apresiasaun Governu nian ba apoiu kontinuadu ne’ebé ITC fó ba Timor-Leste, partikularmente liuhosi projetu 𝗘𝗨 𝗦𝘂𝗽𝗽𝗼𝗿𝘁 𝘁𝗼 𝗥𝗲𝗴𝗶𝗼𝗻𝗮𝗹 𝗜𝗻𝘁𝗲𝗴𝗿𝗮𝘁𝗶𝗼𝗻 𝗮𝗻𝗱 𝗧𝗿𝗮𝗱𝗲  ne’ebé finansia hosi Uniaun Europeia, no kontribui ona ba dezenvolvimentu sistema propriedade intelektuál, prosesu integrasaun iha Organizasaun Mundiál Komérsiu (OMK) no Asosiasaun Nasaun Sudeste Aziátiku (ASEAN), no negosiasaun komérsiu. Ministru Nino Pereira mós husu ITC kontinua apoiu hodi implementa inisiativa hirak ne’e, nune’e mós asisténsia hodi fasilita partisipasaun empreza mikro, ki’ik no médiu (MPME) timoroan sira nia partisipasaun iha ASEAN-China Expo (CAEXPO), ho hanoin atu habelar sira-nia asesu ba merkadu rejionál sira.

Sra. Pamela Coke-Hamilton kongratula Timor-Leste ba nia adezaun ba OMK no integrasaun iha ASEAN, hodi subliña katak marku importante sira-ne’e kria oportunidade foun ba kreximentu ekonómiku ne’ebé sustentável. Nia mós reafirma kompromisu ITC nian atu kontinua fó apoiu ba prioridade dezenvolvimentu Timor-Leste nian, nomeadamente hametin empreza mikro, ki’ik no médiu sira, partisipa iha CAEXPO, implementa Planu Asaun Nasionál ba Indústria Manufatura (PANIT), no kontinua kooperasaun liuhosi inisiativa sira hanesan programa SCOPE nebe mos finansia husi Uniaun Europiea. Parte rua konkorda atu mantein koperasaun besik hodi promove komérsiu, investimentu no dezenvolvimentu ekonómiku iha Timor-Leste.