Partisipasaun Delegasaun Timor-Leste iha Reuniaun Asembleia Jerál WIPO ba dala-68 no reuniaun bilaterál sira iha Genebra, kontribui atu hametin kooperasaun internasionál no prepara etapa implementasaun Kodigu Propriedade Industriál, ne'ebé atualmente iha ona prosesu final iha Parlamentu Nasionál.

Rezultadu Prinsipál sira

1. Organizasaun Mundiál ba Propriedade Intelektuál (OMPI/WIPO). Hasoru malu ho Sr. Daren Tang, Diretor Jeral WIPO.

• WIPO reafirma kompromisu atu kontinua apoia Timor-Leste iha implementasaun Kodigu Propriedade Industriál bainhira lei refere tama ona iha vigor.

• Konkorda atu fó apoiu ba elaborasaun regulamentu implementasaun, prosedimentu administrativu no kapasitasaun téknika.

• Konkorda atu kontinua servisu hamutuk ba estabelesimentu no operacionalizasaun Eskritóriu Propriedade Intelektuál (IP Office).

• WIPO mos konfirma apoiu ba implementasaun sistema dijitál WIPO IPAS, dezenvolvimentu kapasidade rekursu umanu no preparasaun ba dezenvolve Estratéjia Nasionál ba Propriedade Intelektuál (NIPS).

2. Ministériu Propriedade Intelektual, Repúblika Korea (MOIP). Hasoru malu ho Sr. Dr. KIM Yong Sun, Ministru Propriedade Intelektual

• Timor-Leste no Repúblika Korea reafirma kooperasaun ne'ebé di'ak iha área propriedade intelektuál.

• Konkorda atu kontinua apoiu ba formasaun téknika, kapasitasaun rekursu umanu, troka esperiénsia no fortalesimentu institusionál atu prepara implementasaun sistema propriedade intelektuál.

3. Ministériu Ensinu Superior, Siénsia, Teknolojia no Inovasaun Angola. Hasoru malu ho Sr. Albano Vicente Lopes Ferreira, Ministru Ensinu Superior, Siénsia, Teknolojia no Inovasaun

• Timor-Leste no Angola konkorda atu hametin kooperasaun Sul-Sul liuhusi troka esperiénsia iha área inovasaun, siénsia, teknolojia no propriedade intelektuál.

• Diskusaun mos loke oportunidade ba kooperasaun ba futuru iha dezenvolvimentu inovasaun no kapasidade institusionál.

4.  International Trade Centre (ITC). Hasoru malu ho Sra. Pamela Coke-Hamilton, Diretora Ezekutiva

• ITC reafirma nia apoiu kontinuu ba reforma komérsiu no propriedade intelektuál iha Timor-Leste.

• ITC sei fo apoiu masimu ba setor privadu, inklui sira nia partisipasaun iha eventu no expo regional no internasional

• Konkorda atu kontinua kooperasaun iha implementasaun Kode Propriedade Industriál, fortalesimentu institusionál, asisténsia téknika no dezenvolvimentu kapasidade liuhusi programa kooperasaun.

Misaun ida-ne'e konsege hametin relasaun ho parseiru estratéjiku sira no asegura apoiu internasionál ba etapa implementasaun Kodigu Propriedade Industriál. Kooperasaun ne'ebé konkorda durante reuniaun sira sei kontribui ba estabelesimentu Eskritóriu Propriedade Intelektuál, fortalesimentu kapasidade institusionál, digitalizasaun servisu propriedade intelektuál, no dezenvolvimentu sistema propriedade intelektuál ne'ebé efetivu atu apoia inovasaun, investimentu no kresimentu ekonomia Timor-Leste.