Rabilau,[18.10.2024]-Diresaun Nasionál Marketing (DNM), nuudar Diresaun tékniku ida hala’o serbisu Diresaun Jerál Komérsiu nian husi Ministériu Komérsiu no Indústria (MKI) no hanesan Seksaun ba Feira, halo koordenasaun mobiliza no organiza hodi promove produtu potensial  iha eventu Festival Rabilau 2024.

Festival Rabilau hanesan eventu nasionál ida ne’ebé organiza husi Gabinete Prezidente Repúblika (GPR), servisu hamutuk ho Instituisaun relevante sira, hanesan: Sekretáriu Estadu Arte no Kultura (SEAK), Minisériu Turismu no Ambiente (MTA) no Ministériu Komérsiu no Indústria (MKI), inklui mós Instituisaun relevante sira seluk.

Bazeia ba orientasun Gabinete Presidente da República (GPR), Ministériu Komérsiu no Indústria (MKI) mak responsabiliza ba promosaun produtu nasionál sira iha ámbitu realizasaun Festival Rabilau nian liu-husi realizasaun Feira. Tanba ne’e Ministériu liu-husi Diresaun Nasionál Marketing (DNM) hanesan Diresaun tékniku ida ne’ebé responsável ba promosaun, divulgasaun no valorizasaun merkadu produtu nasionál nian, promove grupu agrikola, grupu artezanatu no grupu industrializasaun sira nia prezensa hanesan partisipante direita ba feira refere hahuu husi loron 16 to’o 18 Outobro 2024, lokaliza iha Aldeia Ria Mori, Suco Maubisse, Posto Administrativu Maubisse, Municipio Ainaro.

Sua Ezselénsia Vise Ministru MKI Sr. Augusto Junior Trindade nuudar Koordenador Jerál ba programa Feira nian, iha entrevista DMTIC-DNM nian haktuir katak: Primeiru lugar agradese ba nai-Prezidente Repúblika, ba inisiativa furak. Rabilau hanesan fatin ida furak teb-tebes no fatin ida potensiál boot ba turismu iha Timor-Leste. MKI hanesan mos parte ida de’it ho parte hot-hotu ne’ebé  involve iha Festival ida ne’e. Ministériu nia responsabilidade mak oinsa mobiliza ita nia inan-aman no jovem sira ne’ebé  durante ne’e halo hela sira nia knaar iha área komérsiu nian, hatudu sira nia prontidaun ba xamada ida ne’ebé  Ministério fó no vontade diak lori sira nia produtu mai iha Feira ne’e. Ita nia-inan balun dook teb-tebes husi Viqueque, husi Lospalos, husi Manufahi, husi Aileu, Covalima mos mai partisipa iha ne’e, alén husi Maubisse ho Ainaro hanesan uma-na’in. Bele dehan katak Feira ida diak tebes, haktuir Koordenador Jerál ba Feira refere.

Realizasaun Feira ne’e dook tebes husi Maubisse Vila no defisil tebes ba komunidade sira atu bele asesu, Maibe Ministériu orienta hela Diresaun tékniku Marketing atu hakat ba stan ka baraka ida-idak hodi hatene katak, minimal durante loron tolu (3) ne’e sira hetan netik rendimentu ka lae? Relidade mak hanesan ita akompña katak quaze iha parte kulinária sira ne’e la aguenta. Ita nia komunidade rai-na’in sira ne’ebé  fa’an de’it fehuk, ai-farina ho batar ne’e mos la aguenta tanba produtu ne’ebé  sira lori mai ne’e hotu kedas. Ne’e signifika katak ho realizasaun Feira iha eventu Festival ida ne’e hetan partisipasaun barak no ajuda fo rendimentu ba komunidade lokál. Alén ne’e mos ita husu ba Inan sira ne’ebé fa’an tais, pasta no produtu sira seluk ne’e, mais ou menus loron hirak sira fa’an sira nia produtu hetan netik rendiemntu oituan ka lae? Buat ne’e bei-beik atu ita halo evaluasaun, bainhira ita realiza feira ita hadian tu-tuir kedas.

MKI hanesan Ministériu ida ne’ebé  mak sempre responsabiliza ba Feira iha eventu nasionál sira, iha biban ida ne'e atu informa katak  relasiona ho komemorasaun loron Proklamasaun Indepenénsia RDTL nian tuir plano 28 Novembro sei iha Oecusse-RAEOA. Nune’e ita hein hela husi Sua Ezselénsia Ministro STATAL mos hateten katak sei iha Despacho ida ba liña Minesteriál hot-hotu no ita nafatin resposável ba Feira. Tanba ne’e mak ita hein hela husi despacho ne’e atu hateten saida ba ita. Maibe Ministériu Komérsiu no Indústria konserteza, ita nafatin prontu ba Feira, bainhira ita hetan ona karta tuun mai ita ezekuta.

MKI nia knaar oinsa promove ita nia produtu potensiál sira tantu produtu agríkola, produtu industrializasaun sira no mos produtu artezanatu sira. Hanesan ita haree vizita Sua Ezselénsia Presidente Repúblika Sr. Dr. José Ramos Horta iha loron daruak Feira nian horseik 17 Outobru, mai baraka Feira nian, kontente teb-tebes ho Feira ida diak tebes, hamutuk ho Sua Ezselénsia Primeiro Ministro Interino, Sr. Dr. Marino Asanami Sabino nuudar Prezidente Komisaun Organizadora Festival no kuaze hola produtu sira ne’ebé  aprezenta iha Feira ne’e. Deklara Koordenador Jerál Feira, Sua Ezselensia Vise Ministru MKI.

Parte ikus husi entrevista ne’e Sua Ezselénsia Vise Ministru hanesan Kordenador Jerál ba Feira salienta tan katak ba dahuluk presiza liu mak hasa’e qualidade ita nia produtu sira. Daruak mak bainhira ita nia qualidade produtu hasa’e ona, presiza mos ita nia protidaun atu serbii ka atendimentu ba vizitór sira ba iha Feira ho di-diak atu nune’e bele atrai ema. Ida ne’e mak Diresaun tékniuku Marketing halo hela nia serbisu hodi haree ba prosesu sira ne’e la’o, sei halo evaluasaun. Evaluasaun hodi haree katak saida mak ita presiza tuur hamutuk ho maluk sira ne’ebé  sempre fornese sira nia produtu mai iha Feira sira ne’ebé  responsabiliza ka organiza husi Ministériu. Koordenador Jerál ba Feira hatutan tan katak sei hato’o ba membru Governu sira ne’ebé  orsida sei mai partisipa iha seremónia enseramentu Festival nian, atu halo vizita no hola mos produtu lokál ne’ebé  halo hela promosaun iha baraka Feira nian. Entrevista liu tiha Sua Ezselénsia hakat kedas ba iha baraka ezpozisaun no hola produtu lokál husi grupu agríkola, grupu industrializasun no artezanatu sira.

Remata_

 

Pubika husi: Departamento de Média e Tecnologias de Informação e Comunicação (DMTIC)