Timor-Leste Partisipa iha Enkontro 27 Komisaun Koordenador ASEAN ba Komérsiu Eletróniku no Ekonomia Dixital (ACCED) no Enkontro 12 Komisaun Negosiasaun Acordu Ekonomia Dixital ASEAN (DEFA NC)
Delegasaun Timor-Leste ne’e kompostu husi funsionáriu husi Ministériu Komérsiu no Indústria (MCI) no TIC-TL partisipa hanesan observadór iha Enkontro 27 Komisaun Koordenador ASEAN ba Komérsiu Eletróniku no Ekonomia Dixital (ACCED) no Enkontro 12 Komisaun Negosiasaun ba Acordu Ekonomia Dixital ASEAN (DEFA) ho estadu membru sira ASEAN iha Kuala Lumpur, Malázia.
Enkontro ne’e hala’o hosi loron 23 to'o 28 fulan Juñu 2025 atu diskute no avalia área servisu sira relasiona ho implementasaun medida sira ne’ebé estadu membru sira ASEAN maka acordo ona iha rejiaun ASEAN kona-ba komérsiu eletróniku no transformasaun dixital.
Iha abertura ba reuniaun, Prezidente sira husu Timor-Leste atu fahe atualizasaun kona-ba servisu no iniciativa sira ne’ebé Timor-Leste hala’o. Xefe Delegasaun Timor-Leste, Sr. Flávio Simões, aproveita momentu atu apresente atualizasaun kona-ba servisu estratéjiku sira ne’ebé Timor-Leste halo agora, liu-liu kona-ba dezenvolvimentu Estratéjia Nasionál Politika Komérsiu — ne’ebé Sr. Flávio konfirma katak parte importante mak dezenvolve komérsiu dixital iha nasaun liuhusi politika públika iha área komérsiu, no iha tempo hanesan fó prioridade integrasaun Timor-Leste ba komérsiu dixital ho ASEAN tuir kompromisu Timor-Leste ba integrasaun ekonomia rejiaun ASEAN.
Timor-Leste rekonhese katak ho progresu mundiál, inklui komérsiu dixital, estadu sira presiza iha padrãu rejiaunál no mundiál atu garanti katak beneficiu ne’e inklusivu no justu ba estadu membru sira, liu-liu oinsá progresu ne’e bele fó estabilidade no avansu iha merkadu rejiaunál no mundiál.
Timor-Leste komité atu garanti integrasaun iha área ne’e no fiar katak ho progresu kontinua iha prosesu adesão ASEAN sei ajuda Timor-Leste atu harmoniza ho padrãu rejiaunál no fó kontribuisaun konstrutivu ba integrasaun inklusivu iha ASEAN.
Delegasaun MCI, TIC-TL no ASIA Mobility Diskute Avansu ba Projeitu Pilotu Pagamentu Dixital
Delegasaun husi Ministériu Komérsiu no Indústria (MCI), akompanha husi representante TIC-TL, hasoru ohin ho representante husi ASIA Mobility iha Kuala Lumpur, Malázia. Enkontro ne’e hala’o iha leet forum ASEAN kona-ba economia dixital no komérsiu eletróniku.
Enkontro ida ne’e kontinua hosi reuniaun sira antes ne’ebé hala’o iha Kuala Lumpur no Dili kona-ba projeitu pilotu atu implementa sistema pagamentu dixital ba servisu transporte iha Dili, Timor-Leste.
Durante diskusaun ohin, parte sira halo avaliasaun kle'an kona-ba preparasaun ne’ebé presiza halo tiha antes lançamentu ofisiál ba projeitu pilotu ne’e.
Iha loron mai, espera katak delegasaun husi ASIA Mobility sei vizita Dili atu kontinua koordinasaun no preparasaun implementasaun projeitu iha rai laran.
