Grupu indústria ki’ik partisipa iha formasaun tékniku diversifikasaun tais ba pasta no karteira
Likisá 10 Outubru 2025
Ministériu Komérsiu no Indústria (MCI) atraves Dirasaun Jerál Indústria fó formasaun tékniku ba grupu indústria ki’ik kona-ba diversifikasaun tais ba pasta no karteira.
Formasaun ida-ne’e rasik fó husi Dirasaun Nasionál Indústria Manufakturera ba partisipante sira hamutuk ema sanulu (10) ne’ebé mai husi Munisípiu Likisá no Munisípiu Vikeke.
Formasaun ne’e hala’o durante loron neen (6) iha Postu Administrativu Maubara, Suku Vaviquinia, Munisípiu Likisá.
Li’an mak taka husi Diretór Jerál Indústria, Martins Magno bainhira ofisialmente ensera formasaun ne’e.
Dirasaun Jerál Indústria (DIJE) enkoraja partisipante sira ne’ebé partisipa iha formasaun ida-ne’e, atu aproveita no uja didiak matenek sira ne’ebé partilha husi formadora sira, hodi implementa ho di’ak iha sira nia atividade prátika no dezenvolvimentu negósiu iha futuru.
DIJE mós reforsa katak Governu, liuhusi Ministériu Komérsiu no Indústria, kontinua halo esforsu no buka alternativa di’ak liután atu aumenta kapasidade no dezenvolve kinerja husi empreza ki’ik no média, hodi sira bele sai independente no iha kompeténsia atu konkure ho efisiénsia.
Ida ne’e atu responde ba iha Timor-Leste ni’an adezaun ba membru Asosiasaun Nasaun Sudeste Aziátiku (ASEAN), ne’ebé adezaun ne'e ofisiál sei akontese iha fulan Outubru tinan 2025. Alende ne’e, iha tinan 2024, Timor-Leste mós ofisiál sai membru ba Organizasaun Komérsiál Mundial (WTO).
Iha fatin hanesan mós representante husi Administradór Postu Administrativu (APA) Maubara, Maria Isabel Pereira dos Santos, Xefia seksaun Administrasaun, akresenta katak formasaun ida ne’e konsidera intersante no importante tebes.
Ho formasaun sira hanesan ne’e, ajuda ona kapasita grupu negósiu sira ne’ebé nia orentasaun atividades halai liu ba iha industriá.
Tanba formasaun ida ne’e halai liu ba diversifikasaun tais hodi nakfilak ba iha pródusaun pasta no karteira.
Agradese ba esforsu husi Ministériu Komérsiu no Indústria liuhusi Dirasaun Jerál Indústria, ne’ebé kapasita no suporta grupu indústria sira, liuhusi formasaun ne’e.
Husu atu partisipante sira ne’e uja matenek ida ne’e atu bele dezenvolve di’ak liu ita-boot sira nia atividade negósiu, atu nune’e bele hasa’e ita-boot sira nia rendimentu hodi responde ba ekonómia familia nia.
Partisipa iha serimonia enseramentu formasaun ne’e mai husi Reprezentante Komandate PNTL, Diretór Nasionál Planeamento MCI. Diretór Nasionál USD MCI Likisá, Reprezentante Xefi Suku Vaviquinia.
