𝗬𝗮𝗻𝗴𝗼𝗻 – 𝗠𝘆𝗮𝗻𝗺𝗮𝗿,𝟭𝟴 – 𝟮𝟬 𝗠𝗮𝗶𝗼 𝟮𝟬𝟮𝟲 - Ministériu Komérsiu no Indústria (MCI -Sigla Portugés), liu- husi Diresaun Nasionál Regulasaun Komérsial no Protesaun Konsumidores (DNRCPC – Sigla Portugés) hanesan membru Asean Committee on Consumer Protection (ACCP) partisipa iha 32𝙣𝙙 𝘼𝘾𝘾𝙋 𝙈𝙚𝙚𝙩𝙞𝙣𝙜 ne’ebé mak halao iha Cidade Yangon- Myanmar, husi loron 18 to’o 20 Maio 2026.

ACCP mak enkontru regular ida ne’ebé reúne autoridade sira responsavel ba área protesaun konsumidor iha Estadu Membru ASEAN nian, ne’ebé realiza dala rua iha tinan ida nia laran. Iha enkontru ida ne’e, Timor-Leste mos aprezenta progresu kona-ba implementasaun Rejime Protesaun Konsumidor, relasiona ho implementasaun Lei Protesaun Konsumidor No. 8/2016, hanesan parte husi esforsu kontinua Governu nian atu reforsa no garante direitu, protesaun no seguransa ba konsumidor sira.

Timor- Leste kontribui mos iha ajenda diskusaun sira ne’ebé importante tebes mak hanesan:

• Identifika prioridade estratéjiku sira iha kuadru implemetasaun ASEAN Economic Community (AEC) nian liu- liu iha setór protesaun konsumidor nian;
• Inisiativa no ativiade sira ne’ebé Timor- Leste sei halo hodi komemora Loron Internasional ba Protesaun Konsumidores;
• Konfirma prontidaun Timor-Leste nian atu implementa mekanizmu ODR (Online Dispute Resolution) ka ADR (Alternative Dispute Resolution) hanesan prioridade nasional ne’ebé alinha ho objetivu sira AEC nian;
• Implementa Planu Estratéjiku Asaun ASEAN ba Protesaun Konsumidor (ASAPCP 2026–2030), ne’ebé inklui programa no atividade sira iha área capacity building ho objetivu atu reforsa kapasidade institusional no dezenvolvimentu rekursu umanu hodi apoia Timor Leste nia integrasaun plenu iha ASEAN.
• Prontidaun Timor- Leste nian atu simu kna’ar hodi lidera ka Chair ba enkontru no sai uma nain ka Host ba Enkontru ACCP nian iha tinan 2033, 2035 no mos 2036.
• No mos partisipa ativamente iha diskusaun kona-ba ajenda sira ne’ebé Timor-Leste kontribui ba dezenvolvimentu no implementasaun planu asaun sira ACCP nian.

Delegasaun Timor-Leste ne’ebé partisipa iha 32nd ACCP meeting ne’e mak hanesan: Pontu Fokál MCI nian ba Asuntu ASEAN, 𝗦𝗿𝗮.𝗡𝗮𝘁𝗮𝗹𝗶𝗻𝗮 𝗠𝗮𝗿𝗶𝗮 𝗔𝗺𝗮𝗿𝗮𝗹 𝗱𝗮 𝗖𝗼𝘀𝘁𝗮 no Assesor ba asuntu Komérsiu no Indústria nudar mos Alternate Focal Point ba Protesaun Konsumidor, 𝗦𝗿. 𝗡𝘂𝗻𝗼 𝗱𝗼 𝗥𝗼𝘀á𝗿𝗶𝗼 𝗧𝗿𝗶𝗻𝗱𝗮𝗱𝗲.

𝙈é𝙙𝙞𝙖 𝙈𝘾𝙄