Bangkok, Tailándia, 13 Maiu 2026- Diretór-Jerál Komérsiu Ministériu Komérsiu no Indústria(MCI) Elias de Jesus Fatima, sai nu’udar painelista iha diskusaun painél kona-ba “Adezaun ba Akordu Komérsiu iha Ázia-Pasífiku.”

Durante diskusaun, Timor-Leste fahe ninia esperiénsia nu’udar membru foun liu hosi Asosiasaun Nasaun Sudeste Aziátiku no Organizasaun Mundiál Komérsiu nian, destaka oinsá prosesu adezaun sira apoia transformasaun ekonómika nasionál, reforma governasaun komérsiu, no dezenvolvimentu setór privadu.

Timor-Leste mós fó énfaze ba esforsu sira ne’ebé la’o daudaun atu hametin fasilitasaun komérsiu, promove infraestrutura komérsiu dijitál, no dezenvolve setór produtivu sira hanesan agro-prosesamentu, manufatura kmaan, no empreza ki’ik no médiu sira.

Diskusaun ne'e subliña importánsia hosi kapasitasaun, asisténsia téknika, no kooperasaun rejionál hodi apoia ekonomia sira ne'ebé menus dezenvolvidu no ki'ik sira hodi implementa kompromisu sira komérsiu internasionál nian ho efetivu.

Timor-Leste reafirma ninia kompromisu atu sai nu’udar parseiru ida ne’ebé ativu no konstrutivu iha ámbitu ASEAN no sistema komérsiu multilaterál.