𝐕𝐢𝐬𝐞 𝐌𝐢𝐧𝐢𝐬𝐭𝐫𝐮 𝐊𝐨𝐦𝐞́𝐫𝐬𝐢𝐮 𝐧𝐨 𝐈𝐧𝐝𝐮́𝐬𝐭𝐫𝐢𝐚 𝐫𝐞𝐩𝐫𝐞𝐳𝐞𝐧𝐭𝐚 𝐏𝐫𝐞𝐳𝐢𝐝𝐞𝐧𝐭𝐞 𝐑𝐞𝐩𝐮́𝐛𝐥𝐢𝐤𝐚 𝐢𝐡𝐚 𝐞𝐯𝐞𝐧𝐭𝐮 𝐤𝐚𝐫𝐢𝐝𝐚𝐝𝐞 𝐢𝐝𝐚 𝐢𝐡𝐚 𝐏𝐨𝐬𝐭𝐮 𝐀𝐝𝐦𝐢𝐧𝐢𝐬𝐭𝐫𝐚𝐭𝐢𝐯𝐮 𝐙𝐮𝐦𝐚𝐥𝐚𝐢

Covalima, 30 Marsu 2025

Sua Exelénsia, Vise Ministru Komérsiu no Indústria, Sr. Augusto Júnior Trindade, reprezenta Sua Exelénsia, Prezidente Repúblika, Dr. José Ramos, iha eventu karidade ida iha Postu Administrativu Zumalai nian, munisípiu Covalima, sábadu ne’e, 29 marsu 2025.

Vise-Ministru hateten katak inisiativa ne’e promove husi Prezidente Repúblika ho objetivu atu tulun komunidade sira ne’ebé iha situasaun vulnerável, antes ne’e identifika ona husi autoridade lokál Zumalai no Covalima.

“Desizaun atu fó apoiu ne’e bazeia ba dadus ne’ebé autoridade lokál sira fornese, tanba ne’e mak Sua Exelénsia Prezidente Repúblika pasa kuaze semana ida iha Covalima, vizita fatin oioin hodi ko’alia ho autoridade sira, inan-aman no estudante sira, rona diretamente ba sira-nia nesesidade no identifika oinsá governu no Estadu bele ajuda sira ultrapasa difikuldade ne’ebé sira hasoru,” hateten vise ministru.

Governante ne’e hateten mós katak, durante estadia tomak iha Covalima, Prezidente Repúblika rona preokupasaun populasaun nian iha enkontru ho autoridade lokál sira, lideransa komunitária sira, inan-aman sira, estudante sira no reprezentante sosiedade sivíl sira.

“Prezidente Repúblika sempre rona nafatin ba dezafiu sira ne’ebé povu hasoru.Tanba razaun ida ne’e, nia halo pontu vizita Covalima, haree besik realidade komunidade nian no hato’o ba IX Governu, ne’ebé lidera husi maun boot, Kay Rala Xanana Gusmão, nesesidade atu hetan solusaun konkreta hodi hadi’a kondisaun moris populasaun nian”, akresenta.

Durante vizita, fahe sasán esensiál sira ba família sira ne'ebé iha situasaun vulneravel, tuir identifikasaun sira ne'ebé autoridade lokál sira halo.

Atividade ne’e hetan mós partisipasaun husi Asesór Prezidensiál ho nia ekipa, Prezidente Autoridade Munisipál Covalima, Komandante PNTL munisípiu no autoridade lokál iha postu Zumalai.