Ministru MCI Nino Pereira Vizita QUES KEV atu sustenta industriálizasaun no inovasaun Lokal
Díli, 8 Jullu 2025 – Iha esforsu atu sustenta dezelvolvimentu industriál lokal iha Timor-Leste, Ministru Komérsiu no Indústria (MCI), Nino Pereira, halo vizita ofisiál ba Indústria Printing QUES KEV, ne’ebé lokaliza iha Avenida Almirante Américo Tomás, Colmera, Dili.
QUES KEV mak kompanhia foun iha setór servisu printing, ne’ebé harii ho inisiativa empresáriu Timoroan rasik, no fó prioridade ba uja teknologia modernu, presu aseitável, no kapasidade atende nesesidade kliente sira iha nível nasionál.
Servisu Printing ho Presu Aksesível no Kualidade Profisionál
Diretor Kompñia QUES KEV, Paizinho Tilman, hatetema katak kompanhia ne’e foin harii iha tinan ida liuba ho esperansa atu fó servisu ne’ebé fó benefísiu ba komunidade Timoroan.
"Ita tenta oferese presu diak no produtu kualidade, tanba ita foin hahuu mak ho presu ne’ebé-as bele halo susar. Paizinho Tilman.
Ministru MCI: Ho Liman Timoroan, Timoroan Bele Halo no Bele Kompete
Durante vizita, Ministru Nino Pereira aplauzi inisiativa ne’e ho hateten sentidu orgulho nasionál ba kapasidade Timoroan:
“Industria ne’e prova katak Timoroan bele domína teknologia, operasaun makina, to’o manutensaun. Ho servisu diak, kompanhia nune’e bele aumenta konfiansa ba konsumidór sira,” hateten SE. Nino Pereira.
Indústria Lokal, Diversifikasaun Ekonomia no Sustentabilidade
Ministru Nino fó enfázi katak vizita ne’e parte husi esforsu MCI atu aproxima ba inisiativa diversifikasaun ekonomia, no sustenta micro, pequena no média empresa sira (MPME) ne’ebé iha valor lokal.
“Ita presiza fó fiar ba liman Timoroan. QUES KEV bele sai modelu ba sustenta negósio sira ne’ebé iha base lokal, ho qualidade no inovasaun,” hatete Ministru.
Tecnologia Modernu no Atendimentu Ba Kliente
QUES KEV uja mákinas printing modernu hodi produs material promosaun, dokumentu institusionál, banner, poster, katalogu, no produtu vizual seluk ho variedade modelu no forma.
Servisu ne’e atendi kliente husi instituisaun governamentál, empresa pribadu, organizasaun sivil no partikulár sira, ne’ebé buka solusaun profisionál, rapidu no konfiável.
Kontribuisaun ba Komunikasaun Vizual no Sektor Advertoriál
Ministru Nino Pereira remata ho hateten katak setor printing bele kontribui diak iha komunikasaun sosial no kampanha edukativu ba sosiedade.
“Servisu ne’e fó impaktu direto ba mundu advertoria nian, iha forma visual hodi transforma mensajen iha kontestu aktual no edukativu,” hateten Ministru.
_MídiaICT/MCI)*nz
