𝐕𝐢𝐬𝐞 𝐌𝐢𝐧𝐢𝐬𝐭𝐫𝐮 𝐊𝐨𝐦𝐞́𝐫𝐬𝐢𝐮 𝐧𝐨 𝐈𝐧𝐝𝐮𝐬𝐭𝐫𝐢𝐚 𝐑𝐞𝐩𝐫𝐞𝐳𝐞𝐧𝐭𝐚 𝐈𝐗 𝐆𝐨𝐯𝐞𝐫𝐧𝐮 𝐏𝐚𝐫𝐭𝐢𝐬𝐢𝐩𝐚 𝐃𝐢𝐬𝐤𝐮𝐬𝐚𝐮𝐧 𝐄𝐬𝐩𝐞𝐬𝐢𝐚𝐥𝐢𝐝𝐚𝐝𝐞 𝐛𝐚 𝐏𝐫𝐨𝐩𝐨𝐬𝐭𝐚 𝐋𝐞𝐢, 𝐍𝐮́.𝟏𝟑/𝐕𝐈

Aileu, 01 Outubru 2025

Eselensia Vise-Ministru Komérsiu no Industria 𝑺𝒓. 𝑨𝒖𝒈𝒖𝒔𝒕𝒐 𝑱𝒖𝒏𝒊𝒐𝒓 𝑻𝒓𝒊𝒏𝒅𝒂𝒅𝒆, reprezenta IX Governu partisipa iha diskusaun espesialidade ba Proposta Lei Nú.13/VI (2ª) kona-ba Kódigu Rekuperasaun no Insolvénsia, iha Salaun Mukit Aisirimou, Munisípiu Aileu.

Diskusaun ida-ne'e lidera husi Komisaun ba Asuntu Konstitusionál no Justisa (Komisaun A), Parlamentu Nasionál, Prezidente Komisaun Deputadu, Patrosino Fernandes, ho prezensa husi, Vise-Governadór Sr. Rafael Borges, tékniku no asesór sira.

Objetivu prinisipál husi Proposta Lei kona-ba Kódigu Rekuperasaun no Insolvénsia maka, estabelese kuadru legál klaru no funsionál atu regula situasaun krize finanseira empreza no partikulár sira nian, hodi asegura resposta ekilibrada entre protesaun direitu kredór sira nian no posibilidade ba rekuperasaun devedór viável sira nian. Aleinde-ne'e PPL – Kódigu Rekuperasaun no Insolvénsia mós define prosedimentu sira atu prevene insolvénsia, estimula reestruturasaun dívida devedór sira nian, viabiliza akordu sira ne'ebé permite manutensaun negósiu, no prosesu likidasaun ba empreza falida sira.

Entretantu diskusaun ba espesialidade ne'e, tuir kalendáriu husi Komisaun A Parlamentu Nasionál, sei kontinua durante loron tolu iha semana ne'e, no kada semana loron tolu husi Kuarta too Sexta-Feira, kontinua halo diskusaun apresia no aprova artigu sira ne'ebé seidauk konklui.