𝐌𝐢𝐧𝐢𝐬𝐭𝐫𝐮 𝐊𝐨𝐦é𝐫𝐬𝐢𝐮 𝐈𝐧𝐝ú𝐬𝐭𝐫𝐢𝐚 𝐇𝐚𝐥𝐨 𝐀𝐛𝐞𝐫𝐭𝐮𝐫𝐚 𝐛𝐚 𝐒𝐞𝐫𝐢𝐦ó𝐧𝐢𝐚 𝐊𝐨𝐦𝐞𝐦𝐨𝐫𝐚𝐬𝐚𝐮𝐧 𝐓𝐢𝐧𝐚𝐧 𝟓𝟎 𝐓𝐫𝐚𝐣é𝐝𝐢𝐚 𝐁𝐚𝐥𝐢𝐛𝐨 𝐟𝐢𝐯𝐞 𝐧𝐨 𝐒𝐞𝐥𝐞𝐛𝐫𝐚𝐬𝐚𝐮𝐧 𝐋𝐨𝐫𝐨𝐧 𝐍𝐚𝐬𝐢𝐨𝐧á𝐥 𝐋𝐢𝐛𝐞𝐫𝐝𝐚𝐝𝐞 𝐈𝐦𝐩𝐫𝐞𝐧𝐬𝐚

𝗕𝗼𝗯𝗼𝗻𝗮𝗿𝘂-𝗕𝗮𝗹𝗶𝗯𝗼 𝟭𝟯 𝗢𝘂𝘁𝘂𝗯𝗿𝘂 𝟮𝟬𝟮𝟱

Ministru Komérsiu no Indústria halo abertura ba iha serimónia komemorasaun tinan 50 trajédia Balibo five no selebrasaun loron Nasionál Liberdade Imprensa no iha tempu hanesan halo mós lansamentu ba feira liberdade, ne’ebé hala’o iha Postu Administrativu Balibo Munisípiu Bobonaru.

Iha fulan Outubru 2025, ita hotu-hotu senti orgullu tanba ita konsege ultra passa prosesu boot ida ne’ebé sei makra mós momentu istóriku importante ba Timor-Leste. Iha tempu ne’e, ita nia Nasaun sei ofisiálmente sai Nasaun Membru ba iha Asosiasaun Nasaun Sudeste Aziátiku (ASEAN), ne’ebé marka etapa foun iha jornada dezenvolvimentu no kooperasaun rejionál Timor-Leste nian.

“Ida ne’e mós reflete ita hotu nia partisipasaun, la’ós de’it iha área ekonómika, maibé mós iha asesu ba informasaun. Iha kontestu ne’e, ita sei realiza abertura feira produtu lokal hanesan parte husi komemorasaun loron Aihan Mundial Internasionál, hodi promove produtu nasionál no aumenta konsientizasaun komunidade kona-ba importánsia produtu lokal nian,” hatete Exelénsia Ministru Komérsiu no Indústria, Nino Pereira iha komemorasaun tinan 50 trajédia Balibo five.

Alénde de promove ekonómia hahán lokal, ita hotu-hotu presiza hamutuk atu fortifika ita nia kometmentu no portidaun iha kualker área profisionál ne’ebé ita hakarak dezenvolve.

Istória sai hanesan lalenok ida atu ita nafatin hateke no leno aan, ita mai husi ne’ebé, ita iha ne’ebé no atu ba iha ne’ebé.

Liután Ministru mós subliña katak nu’udar ita hanesan Timor oan, presiza kontinua ho orgullu iha rai doben Timor-Leste, ho vizaun atu moris iha liberdade tomak.

Liberdade ida ne’e la’ós de’it iha polítika, maibé mós iha ekonómia no aihan, hodi ita bele sai Nasaun soberanu iha aspetu hotu-hotu.

Atu atinje prinsipiu hirak ne’e, mak presiza esforsu kolektivu husi ita hotu, importante tebes atu sai hanesan sasukat komun ida, ne’ebé bele mostra katak ita la halai husi realidade, maibé aprende husi eksperiénsia no halo koreksaun atu la’o iha dalan ne’ebé loos ba dezenvolvimentu no prosperidade.

Antes de remata, hakarak hato’o agradesimentu ba Konsellu Imprensa, ho serbisu hamutuk Sekretária Estadu Komunikasaun Sosiál (SEKOMS) no Ministériu Komérsiu no Indústria (MCI), hodi organizasaun eventu importante ida ne’e.

Eventu ne’e fó oportunidade ba ita hotu atu labele haluha, maibé kontinua hatene no hanoin hikas fali kona-ba trajédia Balibo Five, ne’ebé mak envolve jornalista Austrálian nain lima (5). Jornalista sira ne’e mate bainhira halo serbisu profesonál nian hodi fornese informasaun ba mundu tomak kona-ba situasaun iha Timor-Leste iha tempu difísil ne’ebá.

Tanba ne’e, momentu importante hanesan ida ne’e mós fó valor no rekoñesimentu ba kontribuisaun jornalismu nian iha istória luta libertasaun Timor-Leste nian, to’o ikus liberta aan sai hanesan Nasaun soberanu ida, Repúblika Demokrátika de Timor-Leste (RDTL).

Eventu ne’e partisipa husi Reprezentante PAM Bobonaru, Prezidente Konsellu Imprensa, Kargo Diretor Jerál, Diretór Nasionál, Diretór Munisipál no kargo Xefia husi SEKOMS, MCI Administradór Postu Administrativu Balibo, Xefe Suku, Xefe Aldeia, Jornalista media imprime, TV, Radiu no media online, Estudante no Komunidade sira