𝐌𝐢𝐧𝐢𝐬𝐭𝐫𝐮 𝐌𝐂𝐈, 𝐏𝐚𝐫𝐭𝐢𝐬𝐢𝐩𝐚 𝐅𝐨𝐫𝐮𝐦 𝐓𝐚𝐢𝐬 𝟐𝟎𝟐𝟓, 𝐍𝐞’𝐞𝐛𝐞 𝐀𝐛𝐞𝐫𝐭𝐮𝐫𝐚 𝐇𝐮𝐬𝐢 𝐏𝐫𝐞𝐳𝐢𝐝𝐞𝐧𝐭𝐞 𝐑𝐞𝐩ú𝐛𝐥𝐢𝐤𝐚

𝘿𝙞𝙡𝙞, 14 𝙊𝙪𝙩𝙪𝙗𝙧𝙤 2025

Ministru Komérsiu Indústria Sr. Nino Pereira partisipa iha eventu Tais Forum 2025, Rede Soru Na’in. Iha Palacio Prezidensiál Aitarak-Laran, Dili.

Eventu ida-ne'e selebra tais nu'udar Patrimóniu Kulturál intanjivel no haburas diskusaun sira kona-ba Timor-Leste nia prezervasaun no empoderamentu ekonómiku ba artezanatu sira.

“Prezidente Republika José Ramos-Horta, ne’ebé elojia reziliénsia no kriatividade husi feto soru-na’in sira; "Soru tais la'ós de'it artezanatu ida; ida-ne'e maka ita-nia eransa nia fuan no dalan ida ba feto sira-nia empoderamentu ekonómiku. Governu iha kompromisu atu apoia polítika sira ne'ebé prezerva ita-nia kultura no iha tempu hanesan garante mos meius subsisténsia sustentável ba ita-nia Soru Na'in sira."

Ministru MCI hateten; kapasitasaun ba grupu no individu soru na’in sira, iha fase por fase hahú husi Tinjimentu ka halo kor kabas ho kor natural, treinamentu soru ho kualidade diak (exemplo kor lasai, mihis atu ema seluk uza fali hanesan matéria prima hodi produz produtu seluk/ kria kadeia de valor),Kapasitasaun kona-ba diversifikasaun tais ba variedades produtu atu hasa’e liu tan Tais nia valor ekonomia maibe la-halakon nia motivu kultural.

Xefe Misaun UN Women Timor-Leste, Nishtha Satyam, subliña importánsia hosi igualdade jéneru iha dezenvolvimentu ekonómiku; "Igualdade jéneru no feto sira-nia empoderamentu ekonómiku maka sentrál ba dezenvolvimentu sustentável. Apoia inan feton soru nain liuhosi polítika sira ne'ebé bazeia ba evidénsia, investimentu no kolaborasaun entre entidade oioin, garante katak sira-nia abilidade kulturál sira sei tradús ba meius subsisténsia ne'ebé reziliente."

Entretantu promosaun Ministériu Komérsiu no Indústria nian, sai mos prioridade liu-husi eventu nasional Timor-Leste ne’ebe sempre involve grupu soru na’in ka rede soru na’in sira, hodi hatudu rezultadu produsaun ne’ebe úniku no atrativu.

Fórum Tais 2025 ne’e organiza husi Timor Aid no Asosiasaun Soru Na’in - Rede Soru Na’in (RSN), ho finansiamentu no apoiu tékniku husi UN Women Timor-Leste no organiza husi Gabinete Prezidésia Repúblika Demokrátika Timor-Leste. Fórum Tais dahuluk hala’o iha tinan 2023, ne’ebé organiza husi Timor Aid no Fundasaun Alola ho UN Women nia apoiu. Fórum 2025 halibur ofisiál sira governu nian, parseiru dezenvolvimentu sira, sosiedade sivíl, pratikante kulturál sira, no reprezentante sira mídia nian.