𝐌𝐈𝐍𝐈𝐒𝐓𝐑𝐔 𝐌𝐂𝐈 𝐇𝐀𝐒𝐎𝐑𝐔 𝐌𝐀𝐋𝐔 𝐇𝐎 𝐂𝐎𝐌𝐌𝐄𝐑𝐂𝐈𝐀𝐋 𝐀𝐓𝐓𝐀𝐂𝐇É (𝐊𝐀 𝐀𝐃𝐈𝐃𝐎 𝐒𝐄𝐍𝐈Ó𝐑) 𝐌𝐈𝐒𝐀𝐔𝐍 𝐑𝐄𝐈𝐍𝐔 𝐔𝐍𝐈𝐃𝐔 𝐁𝐀 𝐀𝐒𝐄𝐀𝐍

Dili, 30 Outubro 2025

Ministru Komérsiu Indústria Sr. Nino Pereira hala’o reuniaun ho Commercial Attaché (ka Adido Seniór) ba Reforma Regulatóriu, Misaun Reinu Unidu ba ASEAN, Sra. Zoe Dayan, iha sala reuniaun Gabinete Ministru MCI, Fomento Mandarin Dili.

Enkontru ne’e ko'alia kona-ba asuntu sira, liga ho apoiu Governu Reinu Unidu ba Timor-Leste iha faze pós-integrasaun iha ASEAN, foka liu ba iha área Protesaun Konsumidores. Timor-Leste, hanesan membru foun ASEAN, kooperasaun ida ne'e iha signifikadu bo'ot, tanba apoiu husi Governu Reinu Unidu liuhusi UK Office for Product Safety and Standards (OPSS) kontribui direta atu hadi'ak kapasidade institusionál, harmonizasaun lei, no reforma regulatoriu sira, aliña ho kompromisu poítiku no komitimentu sira tuir padraun rejional no internasional prinsipalmente iha área protesaun konsumidores nian.

Sra. Dayan nia matenek iha reforma regulatóriu no inovasaun fornese hanoin sira ne'ebé iha valór hodi rasionaliza prosesu sira no hasa'e kapasidade institusionál. Diálogu ne’e mós esplora oportunidade sira ba interkámbiu tékniku, kapasitasaun, no aliñamentu ho padraun ASEAN no internasionál sira.

Envolvimentu ida-ne’e reflete parseria ne’ebé buras entre Timor-Leste no Reinu Unidu, partikularmente iha kontestu kolaborasaun ASEAN-UK no aspirasaun Timor-Leste nian ba adezaun tomak ba ASEAN.

Ministru Nino Pereira hato'o agradesimentu ba UK atu fó apoio tékniku ba MCI no hatudu Ministériu nia prontidaun atu koopera no hafasil faze foin-intrrasaun ba ASEAN, tanba responsabilidade bo'ot atu hetan benefísiu ba Timoroan sira hotu.