𝘿𝙞𝙡𝙞, 11 𝙉𝙤𝙫𝙚𝙢𝙗𝙧𝙪 2025

Timor-Leste ativamente envolve ona iha Enkontro órgaun setorial ASEAN nian dezde simu estatutu observador iha 2021. Ohin loron, Timor-Leste partisipa iha Sorumutuk Komisaun Koordenadora ASEAN ba dala 20 kona-ba Empreza Micro, Kiik no Mediu (ACCMSME) nu'udar Estadu-membru ASEAN, hafoin partisipa iha Sorumutuk ACCMSME ba dala 18 no 19 nu'udar observador.

ACCMSME serve hanesan órgaun ofisiál ASEAN nian ne'ebé promove no suporta dezenvolvimentu MSME sira iha rejiaun laran tomak. Nia hala'o papél importante ida iha implementasaun polítika no estratéjia sira ne'ebé hametin partisipasaun MSME nian iha integrasaun ASEAN, hodi promove kreximentu ekonómiku liu husi inisiativa sira hanesan Planu Asaun Estratejiku ASEAN nian ba Dezenvolvimentu SME.

Delegasaun Timor-Leste, ne'ebé lidera husi 𝙎𝙧. 𝙍𝙚𝙞𝙣𝙖𝙡𝙙𝙤 𝘽𝙤𝙧𝙜𝙚𝙨 - 𝘿𝙞𝙧𝙚𝙩𝙤𝙧 𝙉𝙖𝙨𝙞𝙤𝙣𝙖𝙡 𝘼𝙥𝙤𝙞𝙤 𝘿𝙚𝙯𝙚𝙣𝙫𝙤𝙡𝙫𝙞𝙢𝙚𝙣𝙩𝙪 𝙈𝙎𝙈𝙀 𝙞𝙝𝙖 𝙈𝘾𝙄, hodi governu nia naran hato’o apresiasaun maka'as ba apoiu ne'ebé Timor-Leste kontinua simu husi Estadu-Membru ASEAN sira durante Prosesu ida-ne'e. Timor-Leste nafatin iha kompromisu atu aliña ho vizaun ne'ebé ASEAN fahe no hein atu kontribui ativamente ba sorumutu ne'e no hasa'e kooperasaun ho Estadu-Membru sira.