MCI divulga Dekreitu Lei Lisensiamentu Industria, Base Indústria no Dekretu Governu kona-ba Prosidementu atribuisaun ba lisensa no vistória Postu Administrativu Tilomar
Covalima – Tilomar, 24 Novembru 2025
Ministériu Komérsiu no Indústria liuhusi Dirasaun Jerál Indústria (DJE) hamutuk ho Gabinete Apoia Juridiku (GAJ), realiza workshop divulgasaun ka desminasaun Dekretu Lei Nú.90/2023 de 27 Dezembru kona-ba Lisensiamentu Indústria no Dekretu Lei Nú.91/2023 de 27 dezembru 2023 Baze Indústria inklui Dekretu Governu Nú. 4/ 2024 de Dezembru, Regulamentu kona-ba Prosidementu atribuisaun ba lisensa no vistória ba iha ambitu lisensiamentu sektoral ba atividade sira Indústria no aprovasaun respetivus ba modelu formuláriu ho nia impressões.
Workshop ne’e realiza iha salaun administrasaun Tilomar, Suku Mau Demo, Aldeia Besak Oan, Postu Administrativu Tilomar, Salele Munisípiu Suai – Covalima.
“Dikretu Lei Lisensiamentu Indústria, Base Indústria no Dekretu Governu Regulamentu kona-ba Prosidementu atribuisaun ba lisensa no vistória, sai hanesan fundamentu ka baze legál ida atu regula atividade hotu-hotu ne’ebé iha relasaun ho setór industriál, liuliu ba atór emprezariál sira.
Tanba razãun ne’e, atór emprezariál sira presiza hatene detalhadamente konteinúdu Dekretu Lei sira ne’e, atu nune’e sira bele kompriende ho di’ak no klaru saida de’it mak sai hanesan obrigasaun no direitu sira nian. Atu bele prevene risku sira, hodi hases aan husi infrasaun.” Deklara Diretór Dirasaun Nasionál Lojistika Sra. Maria Rita S.Q Sarmento, bainhira reprezenta Diretór Jerál Indústria.
Entertantu, iha workshop divulgasaun Dekretu-Lei ne’e, abertura husi reprezentante PAM Suai, Sr. Filomino Cardoso, Sekretáriu III ba Asuntu Sosiais, ne’ebé esklarese kona-ba atividade indústria ne’ebé emprezáriu sira halo.
Liután Sekretáriu III, rekoñese katak durante tempu naruk, setór ne’e seidauk iha mekanismu klaru atu regulariza atividade negósiu sira nian. Tanba razãun ne’e, nia agradese ba Ministériu Komérsiu no Indústria, ne’ebé disponibiliza tempu atu mai divulga Dekretu-Lei tolu (3) ne’e, importante tebes ba orientasaun no regulariza atividade industriál sira
Workshop divulgasaun Dekretu Lei ne’e modera husi Dr. Gregorio da Silva, Koordenadór Gabinete Jurídiku, no oradór sira ne’ebé mak peritu iha área Direitu nian mak Dr. Guido Moniz Goncalves no Mariano Ribeiro.
Metodolojia ne’ebé uza mak abordajen partisipatória, tanba partisipante sira hetan oportunidade atu envolve direitamente iha diskusaun grupu.
Partisipante sira sei diskute filafali perguntas sira ne’ebé prepara tiha ona husi oradór sira, no rezultadu husi diskusaun sei aprezenta fali, antes, oradór sei kontinua ho esplikasaun detalhadu kona-ba kontudu Dekretu-Lei tolu ne’e.
Partisipante sira mai husi APA Tilomar, emprezária sira, estudante Sekundaria Publika Filial Tilomar, Reprezentante Komandante PNTL Sekuadra Tilomar, F-FDTL, Reprezentante BCTL, Lina Ministrial sira, Komunidade no Juventude.
