𝐌𝐢𝐧𝐢𝐬𝐭𝐫𝐮 𝐌𝐂𝐈 𝐬𝐢𝐦𝐮 𝐯𝐢𝐳𝐢𝐭𝐚 𝐡𝐮𝐬𝐢 𝐄𝐦𝐛𝐚𝐢𝐱𝐚𝐝ó𝐫 𝐕𝐢𝐞𝐭𝐧𝐚𝐦 𝐛𝐚 𝐉𝐚𝐤𝐚𝐫𝐭𝐚

Dili, 27 Novembru 2025

Ministru Komérsiu no Indústria Sr. Nino Pereira simu vizita kortezia husi Embaixadór Vietnam ba Jakarta Indonezia Sr. Ta Van Thong, iha Gabinete Ministru MCI, Fomentu Mandarin Dili.

Vizita ne’e, fó oportunidade hodi diskute kona-ba relasaun bilateral entre Timor-Leste ho Vietnam nomos partilla informasaun kona-ba integrasaun Timor-Leste iha ASEAN ne’ebe sei fó benefísiu bo’ot ba Timor-Leste liu-liu iha área ekonomia no komérsiu.

Embaixador Ta Van Thong esklarese katak, Vietnam mos hasoru situasaun hanesan ho Timor-Leste antes sai membru ASEAN iha tinan tolu nulu liu ba, ho adezaun ida ne’e bele sai plataforma ida ne’ebé fó oportunidade bo’ot ba Timor-Leste hodi aprende no hadiak kapasidade dezenvolvimentu.

Sorumutu ne’e hanesan parte importante mai Timor-Leste, tanba iha tinan oin 2026, Vietnam sei loke Embaixada ofisiál ida iha Timor-Leste, ho inisiativa ida ne’e maka sei fó balansu relasaun diplomátiku no fó fasilidade ba kooperasaun direitu entre nasaun rua.

Delegasaun husi Vietnam mos sei mai vizita Timor-Leste iha tinan oin, inklui emprezáriu sira iha kooperasaun ho MCI, sei organiza fórum negósiu entre Timor-Leste ho Vietnam ho objetivu atu mobiliza investimentu iha setór turismu, agrikultura, peskas, indústria nomos dezenvolvimentu parke indústrial.

Vizita ne’e hatudu klaru katak relasaun Timor-Leste ho Vietnam sei kontinua fortalese no ASEAN sei sai ponte ida atu fó oportunidade.