𝐀𝐛𝐞𝐫𝐭𝐮𝐫𝐚 𝐅𝐨𝐫𝐦𝐚𝐬𝐚𝐮𝐧 𝐤𝐨𝐧𝐚-𝐛𝐚 𝐋𝐞𝐢 𝐧𝐨 𝐏𝐨𝐥𝐢𝐭𝐢𝐤𝐚 𝐊𝐨𝐦𝐩𝐞𝐭𝐢𝐬𝐚𝐮𝐧 𝐧𝐨 𝐏𝐫𝐨𝐭𝐞𝐤𝐬𝐚𝐮𝐧 𝐊𝐨𝐧𝐬𝐮𝐦𝐢𝐝𝐨𝐫-𝐅𝐚𝐳𝐞 𝐃𝐚𝐫𝐮𝐚𝐤 𝐁𝐚 𝐅𝐮𝐧𝐬𝐢𝐨𝐧𝐚𝐫𝐢𝐮 𝐌𝐂𝐈
𝐃í𝐥𝐢, 𝟎𝟑 𝐃𝐞𝐳𝐞𝐦𝐛𝐫𝐮 𝟐𝟎𝟐𝟓
Ministériu Komérsiu no Indústria (MCI), liu husi Diresaun Jerál Indústria, Sr. Martins Magno, iha fatin reprezenta Ministru Komérsiu no Indústria, Sr. Nino Pereira, lança Formasaun kona-ba Lei no Politika Kompetisaun no Proteksaun Konsumidor, ne’ebé hala’o iha Pusat Budaya Indonézia, Díli.
Objetivu hosi formasaun ne’e atu fó oportunidade ba partisipante sira hodi:
• Hatene direitu proteksaun konsumidor sira, liu-liu wainhira halo tranzasaun komérsiál.
• Kompriende obrigasaun ne’ebé diak no justu iha merkadu.
• Aprende husi esperiénsia rejional liuhusi Sekretariadu ASEAN, ne’ebé fó apoiu ba MCI liu husi Diresaun Nasional Regulasaun Komérsiál no Proteksaun Konsumidor (DNTRCP).
Iha diskursu abertura, Diretor Gerál Indústria, Sr. Martins Magno, fo apresiasaun ba Sekretáriu Jeral ASEAN, Sua Excelénsia Dr. Kao Kim Hourn, tanba nia konsiderasaun no aprovasaun ba pedidu Timor-Leste atu organiza treinamentu importante ida ne’e.
“Timor-Leste simu hanesan membru ASEAN pleno, ita agora simu responsabilidade barak, liu liu Ministériu Komérsiu no Indústria hanesan institusaun lider IX Governu Konstitusionál ba pilar ekonomia, no Proteje direitu konsumidor no garante kompetisaun justu mak parte esensial husi pilar ekonomia, atu sustenta krezimentu ekonomia ne’ebé sustentavel no harmoniza ho estandár ASEAN.” Hateten Diretor Geral Indústria.
Formasaun ne’e mos fó oportunidade ba instituisaun parseiru sira ne’ebé servisu hamutuk ho MCI, hanesan, Ministériu Saúde, Ministériu Agrikultura, AIFAESA, Alfândega, IQTL, CLN, TANE Konsumidor no instituisaun relevante seluk.
Treinamentu loron rua ida ne’e sai hanesan etapa signifikativu no memorável iha viajen Timor-Leste hanesan membru foun iha família ASEAN.
Entertantu formasaun ne’e MCI liuhusi DNTRCP, organiza hamutuk ho Sekretariadu ASEAN.
Partisipa iha abertura ne’e Diretor Geral Indústria, Diretor Nasional RH MCI, Diretora Nasional Regulasaun Komersial no Protesaun Konsumidores, Xefe Departamentu sira, Sra. Karina Utari – Ofisiál Sénior ba Kompetisaun no Proteksaun Konsumidor, Sekretariadu ASEAN, Sra. Retno Wiranti – Ofisiál ba Politika no Lei Kompetisaun, Sekretariadu ASEAN, inklui Formandu sira.
