𝗙𝗲𝘀𝘁𝗲𝘇𝗮 𝗡𝗮𝘁𝗮́𝗹 𝟮𝟬𝟮𝟱, 𝙁𝙤́ 𝘿𝙤𝙢𝙞𝙣 𝙇𝙞𝙪 𝙃𝙪𝙨𝙞 𝘼𝙨𝙖𝙪𝙣 𝙆𝙖𝙧𝙞𝙩𝙖𝙩𝙪𝙫𝙖 𝙗𝙖 𝗗𝗮𝗱𝘂𝗿 𝘀𝗶𝗿𝗮 𝗶𝗵𝗮 𝗣𝗿𝗶𝘇𝗮𝘂𝗻 𝗚𝗹𝗲𝗻𝗼, 𝗘𝗿𝗺𝗲𝗿𝗮

Gleno, Ermera, 16 Dezembru 2025

Ministeriu Komérsiu no Industria liu husi Gabinete Vise-Ministru servisu hamutuk ho Unidade Servisu Sosiedade Sivíl no assuntu sosiál prezidénsia Repúblika nian no Gabinete Vise Primeiru Ministru, Ministru Koordenador Asuntu Ekonómiku no Ministru Turismu no Ambiente halao asaun karitativa ba prizioneiru sira iha Estasionamentu Prizionál Gleno, Fatuquero, Munisípiu Ermera.

Asaun Karitativa ne'e programa husi Unidade Servisu Sosiedade Sivíl no assuntu sosiál prezidénsia Repúblika nian no servisu hamutuk ho parte governu liu husi Gabinete VPM no VMCI, hodi entrega direta Parsél Natal hamutuk 110, ba prizioneiru sira inklui funsionáriu Limpeja sira ne’ebé serbisu iha Prizaun Refere, ho konteúdu nesesidade bázika hanesan manta, roupa, pasta-dente, rinso, sabaun, shampó no mos fasilidade desportiva nian.

Tuir dadus ofisiál, Estasionamentu Prizionál Gleno agora totál prizioneiru iha 97, inklui feto 20, 3 bebé (feto 2 no mane 1) no nain 4 estranjeiru. Bebé sira hela hamutuk ho sira nia inan, tanba nia inan mak iha problema maibé nia oan inosente. Bazeia ba lei ne’ebé permite oan hela ho inan to’o tinan 2 hafoin mak entrega ba família. Autoridade prizaun sira, iha kooperasaun nafatin ho setór Saúde atu kontinua tau matan espesial ba bebé sira, tanba sira inosente no presiza protesaun.