Ministru Komérsiu no Indústria konsidera importansia avaliasaun atividade Diresaun Jerál Indústria prióde 2025

Dili, 23 Dezembru 2025

Diresaun Jerál Indústria halo avaliasaun ba implementasaun atividade sira durante períodu tinan 2025, hanesan sasukat ida atu hatene no haree ho klaru rezultadu no atinjimentu husi implementasaun programa no atividade sira, identifika dezafiu ne’ebé hasoru, no hametin estratéjia atu hadia kualidade serbisu no kontribuisaun ba dezenvolvimentu setór indústrial iha Timor-Leste.

Iha diskursu ne’e, Sua Exelénsia Ministru Komérsiu no Indústria, Nino Pereira, husu ba Direjente, Xefia sira no funsionáriu tomak atu sai servidór públiku ne’ebé íntegriu, profisionál no komprometidu, hodi hatudu nafatin dezempenhu di’ak, disipliña no responsabilidade boot iha hala’o servisu.

Liu husi esforsu kolektivu ne’e, espera katak funsionáriu ida-idak bele fó kontribuisaun signifikativu hodi hadia no hametin Ministériu Komérsiu no Indústria ninia papel estratéjiku, liuliu iha prosesu dezenvolvimentu sustantável iha área Komérsiu no Indústria, ba benefísiu dezenvolvimentu ekonomiku.

Tanba avaliasaun atividade importante tebes hodi bele hatene ho di’ak nivel implementasaun programa ka atividade sira ne’ebé halo ona durante períodu tinan 2025, tanba dezenvolvimentu iha setór Indústria mós sai hanesan fatór determinante ida iha pilar dezenvolvimentu no diversifikasaun ekonómia iha rai laran.

Liután Ministru mós konsidera katak kontribuisaun ne’e presiza mai husi partisipasaun ativa ema ida-idak nian, liuhusi matenek no kapasidade profesionais ne’ebé iha, hodi fó kontribuisaun ba ita nia Nasaun doben Timor-Leste, liu husi asaun sira ne’ebé konkretu no planeadu ho di’ak, ita bele garante katak iha prosesu lubuk sira ne’ebé sei ita hasoru, liuliu iha partisipasaun máximu iha eventu sira iha kuadru ASEAN, Timor-Leste bele hatudu nia prezensa, kapasidade no kompromisu ho di’ak