𝐌𝐢𝐧𝐢𝐬𝐭𝐫𝐮 𝐧𝐨 𝐕𝐢𝐬𝐞-𝐌𝐢𝐧𝐢𝐬𝐭𝐫𝐮 𝐌𝐂𝐈 𝐡𝐚𝐥𝐚’𝐨 𝐄𝐧𝐤𝐨𝐧𝐭𝐫𝐮 𝐌𝐞𝐧𝐬𝐚́𝐥 𝐡𝐨 𝐃𝐢𝐫𝐞𝐭𝐨́𝐫 𝐉𝐞𝐫𝐚́𝐥 𝐧𝐨 𝐃𝐢𝐫𝐞𝐭𝐨́𝐫 𝐍𝐚𝐬𝐢𝐨𝐧𝐚́𝐥 𝐬𝐢𝐫𝐚
Dili, 19 Marsu 2025
Sua Exelénsia, Ministru Komérsiu no Indústria, Sr. Nino Pereira, no Sua Exelénsia, Vise-Ministru Komérsiu no Indústria, Sr. Augusto Júnior Trindade, hala’o Enkontru Mensál ho Diretór Jerál (DGs) no Diretór Nasionál (DNs), Tersa-feira ne’e, 18 Marsu, iha salaun enkontru Ministériu Komérsiu no Indústria (MCI), iha Fomento Mandarin, Dili.
Enkontru ne’e ho objetivu atu atualiza informasaun kona-ba progresu atividade sira, identifika dezafiu sira no diskute solusaun sira hodi hadi’a servisu Ministériu nian.
Iha enkontru ne’e, Ministru no Vise Ministru rona diretamente husi Diretór Jerál no Diretór Nasionál sira kona-ba situasaun atuál, dezafiu ne’ebé hasoru no estratéjia sira atu hadi’a servisu Ministériu nian, tantu ba tinan ida ne’e no ba futuru.
Ministru Komérsiu no Indústria, Sr. Nino Pereira subliña nesesidade ba koordenasaun ne’ebé di’ak liu entre nível nasionál no munisípiu atu nune’e bele optimiza servisu iha baze.
“Ita buka para redus viajen lokal, tamba iha servisu balun diresaun munisipiu sira bele halo hanesan monitorizasaun, inspesaun ka levantementu dadus ne’ebe mak sira bele halo hau hanoin ita halo kordenasaun deit para oinsa servisu sira ne’e bele lao.”
Liután, Ministru reforsa importánsia responsabilidade nian iha utilizasaun rekursu Estadu nian, enkoraja Diretór Jerál sira no Diretór Nasionál sira atu serbí ho kompromisu no transparénsia, hodi garante katak kualidade servisu fó benefísiu ba populasaun no nasaun.
Iha enkontru hanesan Vise Ministru Komérsiu no Indústria, Sr. Augusto Júnior Trindade, enkoraja Diretór Jerál no Diretór Nasionál sira atu servisu hamutuk hodi buka solusaun ba dezafiu ekonómiku nasaun nian.
“Hadia no dezenvolve komunikasaun hodi hametin sinergia institusional ba prestasaun servisu ho prokutividade tamba Ami nain rua Ministru no Vise Ministru fo konfiansa tebes-tebes ba ita boot sira, no ita boot sira sai diretur, xefe departementu, ita tenke nakloke servisu ekipa hodi fo solusaun ba problema ekonomia iha rai laran”.
Enkontru ne’e hetan partisipasaun husi Diretór Jerál sira, Diretór Nasionál sira, Xefe Gabinete no asesór nasionál no internasionál sira.
