𝐄𝐧𝐤𝐨𝐧𝐭𝐫𝐮 𝐊𝐨𝐨𝐫𝐝𝐞𝐧𝐚𝐬𝐚𝐮𝐧 𝐡𝐨 𝐏𝐀𝐌

𝐃𝐢𝐥𝐢, 𝟏𝟏 𝐃𝐞𝐳𝐞𝐦𝐛𝐫𝐮 𝟐𝟎𝟐𝟓

Ministru Komérsiu no Indústria Sr. Nino Pereira, ohin hala’o reuniaun ho Prezidente Autoridade Munisipiu Dili(PAM) Sr. Francisco dos Santos ho nia ekipa hodi reforsa koordenasaun no kolaborasaun institusionál.

Enkontru ne’e foka ba koordenasaun oinsa hametin kooperasaun servisu entre Ministériu no Autoridade Munisipál, iha área komérsiu no dezenvolvimentu ekonómiku lokál. Parte rua diskute kona-ba estratéjia sira atu revitaliza sentru komersial rua hanesan; Taibessi no Maneluana ne’ebe ho fasilidade ladún di’ak ona, servisu bee-moos, kanalizasaun, no sentina ne’ebé la adekuadu inklui numeru vendedor ambulante sira ne’ebé kontinua aumenta.

Ministru Komérsiu no Indústria subliña importánsia husi kolaborasaun besik ho autoridade munisípiu sira hodi garante katak polítika nasionál sira implementa ho efetivu iha nivel lokál. Nia destaka katak esforsu hamutuk sira esensiál atu promove kreximentu ekonómiku sustentável hodi eleva kondisaun merkadu sai dignu, seguru no asesivel.

Prezidente Francisco dos Santos hato’o nia kompromisu atu servisu hamutuk ho Ministériu ne’e, hodi nota katak koordenasaun ne’ebé efetivu sei ajuda hasoru dezafiu sira ne’ebé merkadu no indústria lokál sira hasoru. Nia reafirma prontidaun PAM nian atu aliña prioridade munisípiu sira ho estratéjia nasionál sira ba di’ak povu nian.

Enkontru ne’e marka pasu importante ida iha hametin lasu institusionál sira no garante katak inisiativa sira komérsiu no indústria nian hetan koordenasaun iha nível nasionál no munisípiu sira. Parte rua konkorda atu kontinua diálogu regulár no planeamentu hamutuk hodi atinji objetivu sira.

Partisipa iha sorumutu ne’e Diretor Nasional komérsiu Internu, Xefe Merkadoria MCI, Asesor sira nomos ekipa sira husi Auridade Munisipal.