Timor-Leste Hametin Relasaun Ekonómika Iha Enkontru Ho Nasaun ASEAN, husi Golfu No Xina

Ministru Komérsiu no Indústria, Nino Pereira, partisipa iha Fórum Ekonómiku Fortune ASEAN-GCC-Xina, ne’ebé hala’o iha Kuala Lumpur, Malázia, iha loron 27-28 Maiu 2025. Enkontru ne’e organiza hosi Governu Malázia, liuhosi Ministériu Investimentu, Komérsiu no Indústria,  parseria ho revista Fortune, no halibur hamutuk reprezentante sira hosi Asosiasaun Nasaun Sudeste Aziátiku (ASEAN), Konsellu Kooperasaun Golfu (GCC) no Repúblika Populár Xina.

ASEAN-GCC-Xina Fortune halibur dirijente governu sira, polítiku sira no reprezentante sira hosi setór privadu hosi rejiaun tolu, ho objetivu atu hametin kolaborasaun estratéjiku iha área sira hanesan teknolojia emerjente sira, investimentu sustentável no seguransa enerjétika. Eventu ne’e hala’o iha paralelu ho Simeira dahuluk ASEAN-GCC-Xina, Simeira daruak ASEAN-GCC – ne’ebé partisipa mós hosi Ministru Nino Pereira à ba Simeira ASEAN ba dala 46, ne’ebé partisipa husi Primeiru-Ministru Kay Rala Xanana Gusmão.

Fórum ne'e fornese plataforma ida ba diálogu hodi identifika reforma sira ne'ebé brani no solusaun polítika sira ne'ebé ho objetivu atu promove futuru ida ne'ebé sustentável no inkluzivu. Ho tema “Inkluzividade no Sustentabilidade”, diskusaun sira foka ba dezafiu prinsipál sira ne’ebé empreza sira hasoru, estratéjia sira hodi hametin investimentu no prátika negósiu sira ne’ebé ho objetivu atu hasa’e kompetitividade globál. Hamutuk, ASEAN, GCC no Xina reprezenta konsumidór liu biliaun rua no besik portsentu 20% hosi Produtu Internu Brutu mundiál.

Iha loron 27 fulan Maiu kalan, Ministru Komérsiu no Indústria mós marka prezensa iha Jantar Ofisiál Gala ne’ebé oferese ba delegasaun partisipante sira, ne’ebé hetan partisipasaun husi dirijente ASEAN, ministru ekonomia, reprezentante setór privadu husi GCC no Xina. Programa ne’e inklui diskursu abertura, aprezentasaun kulturál no lansamentu knananuk tema ASEAN-GCC-Xina, ne’ebé simboliza hametin lasu ekonómiku no kulturál entre rejiaun tolu ne’e.