Timor-Leste Partisipa iha Sosializasaun Rejionál Planu Estratéjiku AEC 2026–2030 iha Kuala Lumpur
===============================================================
Kuala Lumpur, 12 Juñu 2025 - Iha kontinuidade hosi envolvimentu ativu Timor-Leste iha integrasaun rejionál, Ministériu Komérsiu no Indústria (MCI), ne’ebé lidera husi Diretór Jerál Komérsiu, Sr. Nelito Lima de Araújo, ho ekipa partisipa iha sosializasaun rejionál kona ba Planu Estratéjiku Komunidade Ekonómika ASEAN (AEC) 2026–2030. Eventu ne'e akontese iha Salaun Perdana, Ministériu Komérsiu Internasionál no Indústria, iha Kuala Lumpur, Malázia.
Inisiativa importante ne’e hala’o iha ámbitu Vizaun Komunidade ASEAN 2045, ho apoiu tékniku husi Governu Austrália liuhosi programa Aus4ASEAN Futures no Deutsche Gesellschaft für Internationale Zusammenarbeit (GIZ) GmbH.
AEC 2026–2030: Fornese Diresaun Estratéjiku ba Integrasaun Ekonómika Rejionál
Planu Estratéjiku AEC 2026–2030 maka dokumentu orientadór no vizionáriu ida ne'ebé hakarak atu aprofunda integrasaun ekonómika iha rejiaun. Hatuur objetivu estratéjiku 6, metas 99 no medida estratéjiku 192, ho objetivu atu hametin kompetitividade ASEAN nian iha ekonomia globál.
Partisipasaun Ativa Timor-Leste no Estadu Membru sira
Delegasaun timor-oan hetan oportunidade hodi halo interasaun ho reprezentante Estadu-membru sira ASEAN nian, nasaun parseiru sira hanesan Austrália, Xina, Índia no Koreia (ASEAN Plus), no mós membru sira hosi setór privadu, sosiedade sivíl, akadémiku no mídia.
Iha sorumutu ne’e ko’alia kona-ba asuntu prinsipál sira ba futuru integrasaun ekonómika nian, inklui:
• Inovasaun no teknolojia
• Hasa'e produtividade no dijitalizasaun
• Padronizasaun no armonizasaun ba produtu sira
• Transparénsia no relatóriu
• Estabelese saláriu mínimu rejionál ida
• Asaun konkreta sira hodi promove integrasaun ekonómika
Impaktu Esperadu: ASEAN Ida Ne’ebé Kle’an no Kompletamente Integradu
Enkontru sosiál iha Kuala Lumpur reforsa rejiaun nia kompromisu atu harii ASEAN ida ne'ebé integradu, reziliente no inkluzivu. Diskusaun no konsensu ne’ebé hetan iha enkontru ne’e hein atu kontribui ba implementasaun efetivu planu estratéjiku nian, hodi garante katak benefísiu sira husi integrasaun ekonómika to’o ba komunidade hotu-hotu iha rejiaun ne’e. *nz
