𝐇𝐀𝐁𝐔𝐑𝐀𝐒 𝐈𝐍𝐎𝐕𝐀𝐒𝐀𝐔𝐍 𝐉𝐔𝐕𝐄𝐍𝐓𝐔𝐃𝐄 𝐈𝐇𝐀 𝐒𝐄𝐓Ó𝐑 𝐏𝐑𝐎𝐃𝐔𝐓𝐈𝐕𝐔 𝐈𝐇𝐀 𝐓𝐈𝐌𝐎𝐑-𝐋𝐄𝐒𝐓𝐄

Dili, 26 Juñu 2025- Ministru Komérsiu no Indústria Sr. Nino Pereira halo abertura ba atividade Youth Co-Lab ne’ebe organiza husi Alumni Parlamentu Foinsa’e Timor-Leste(APFTL) no ekipa HAKFOUN, ho tema “ Haburas inovasaun juventude iha setór produtivu ba kreximentu ekonomia inkluzivu iha Timor-Leste”, iha edifisiu Fundação Oriente Dili, Timor-Leste.

Ministro MCI, Sr. Nino Pereira apresia ba inisiativa APFTL ne’ebe organiza atividade ne’e, hodi fo espasu no oportunidade ba grupo produtivu sira hodi espresa sira nia inisativa iha eventu ne’e.

“Apresia ba APFTL sira nia kreatividade, inisiativa, hodi organiza tan eventu sira hanesan ne’e, no hamosu tan Youth Co-Lab hodi fo espasu ba joven sira, atu bele fasilita malu, inspira, estimula no enkoraja malu,  ida ne’e hatudu sentido responsabilidade ida katak, ita tenki tau importánsia ba kualker atividade sira ne’ebe lori impaktu pozitivu ba foinsa’e sira, hau hanoin liafuan xave ne’e ita presija hare’e”. Ministro MCI hateten

Objetivu husi Youth Co-Lab ne'e, hanesan espasu ida hodi fahe koñesimentu no esperiénsia entre grupu produtor, emprezáriu foinsa'e, setór privadu sira, ofisial Governu nian, instituisaun Finanseira instituisaun akadémika sira, hodi hametin kolaborasaun iha setór produtivu.

Iha okaziaun ne’e Ministro Nino, halo vizita ba kada exibisaun hodi koa’lia ho grupos produtivos sira ne’ebe maka demonstra sira nia kreatividade.

Atividade ne’e  hetan partisipa husi; Diretor Oxfam iha Timor-Leste, Mr. Pankaj Anand, Instituisaun Públiku, TIC TIMOR, I.P, Parseiru Dezenvolvimentu: DFAT, PARTISIPA, PROSIVU, TOMAK, Ajénsia UN: ILO, Intituisaun Akadémika no Instituisaun Peskiza; UNTL, DIT, UCT, UNPAZ, UNITAL, LA’O HAMUTUK no grupu produtivu sira mak hanesan: TILOFE, EAMO, FJDE, SERA LALANO, AST RABEKA, BOFAN, Batara Noodles, Kios Metenek, GHEK, Parcic, Aroma Timor no membru APFTL.